Ookla компанияси январ ойида дунё мамлакатларида қайд этилган интернет тезлиги бўйича ҳисоботини тақдим этди.

Сингапур — кенг полосали интернет, Бирлашган Араб Амирликлари — мобил интернет бўйича ҳаммадан тез.

Тадқиқотга кўра, январ ойида жаҳонда симли интернет тезлиги ўртача: юклаб олиш учун — 97,61 Мбит/сония, жўнатиш учун — 52,84 Мбит/сонияни ташкил этди.

Сингапурда интернет тезлиги: юклаб олиш учун — 336,45 Мбит/сония, жўнатиш учун — 275,30 Мбит/сония. Кейинги ўринларда: БАА (310,05 Мбит/с), Гонконг (305,71 Мбит/с), Франция (287,44 Мбит/с) ва Исландия (281,95 Мбит/с).

Юклаб олиш тезлиги ўртача 3 Мбит/сонияни ташкил этган Сурия ва Куба рейтингда сўнгги ўринларни эгаллади.

Январда глобал мобил интернет тезлиги деярли кенг полосали интернет даражасига чиқиб, юклаб олиш тезлиги 91,24 Мбит/сонияга етди.

БАА — мобил интернет тезлиги бўйича жаҳонда етакчи: юклаб олиш тезлиги 545,94 Мбит/сонияга етиб, ўтган йил январидаги кўрсаткич (302,38 Мбит/с) анча яхшиланди. Кейинги ўринларда: Қатар (521,51 Мбит/с), Кувайт (314,39 Мбит/с), Болгария (252,05 Мбит/с) ва Баҳрайн (213,09 Мбит/с).

Рейтинггга киритилган 104 мамлакат орасида сўнгги ўринларни Боливия (13,20 Мбит/с) ва Эритрея (1,88 Мбит/с) банд этди.

Ушбу рейтингда Ўзбекистон кенг полосали интернет тезлиги (51,02 Мбит/с) бўйича (беш поғона юқорилаб) 68-ўринни, мобил интернет тезлиги (81,58 Мбит/с) бўйича 75-ўринни эгаллади.