Халқ таълими вазири Шерзод Шерматов умумтаълим мактаблари ўқувчилари учун тўртинчи чорак дарслари телевидение ва интернет орқали бошланишини маълум қилди.

«Душанба, 30 март кунидан бошлаб ҳар куни cоат 8:30дан Ўзбекистон миллий телерадиокомпанияси билан ҳамкорликда тайёрланган дарсларимиз 3 та канал орқали намойиш этилади (1-4, 5-8, 9-11 синфлар учун биттадан канал). Юртимизда коронавирус пандемиясига қарши курашиш бўйича кучайтирилган чора-тадбирлар амалга оширилмоқда. Шу билан биргаликда, фарзандларимизнинг уйда бўлишига қарамай, уларнинг 4-чорак ўқишларини телевидение ва интернет орқали бошлашимиз керак.

Карантин даврида фарзандларимиз ўқишини давом эттириши учун Ўзбекистон миллий телерадиокомпанияси билан ҳамкорликда 100 дан ортиқ фидойи педагоглар иштирокида телевизион дарслар тасвирга олинди. Улар орасида давлат мукофоти соҳиблари, дарслик муаллифлари, йилнинг энг яхши фан ўқитувчилари ҳам кўпчиликни ташкил этади.

Ушбу жараёнда иштирок этаётган барча педагогларимизга, Миллий телерадиокомпанияси раҳбарияти ҳамда ижодий жамоасига ўз миннатдорчилигимизни билдирамиз», — дея ёзган Шерзод Шерматов.