Давлатимиз раҳбари аскарлар ҳарбий қасамёд қилишдан олдин албатта Ўзбекистон тарихи ва «Темур тузуклари» фанидан синов топшириши кераклигини таъкидлади. Илғор ҳарбий қисмларга улуғ саркардаларимизнинг номини бериш, моҳир лашкарбоши боболаримиз ҳақида илмий тадқиқотлар, бадиий китоблар, кинолар яратишга кўрсатма берди.

Ўзбекистон Республикаси Президенти, Қуролли Кучлар Олий Бош Қўмондони Шавкат Мирзиёев 20 май куни Шарқий ҳарбий округга қарашли ҳарбий қисмлардан бирига ташриф буюрди.

Муддатли ҳарбий хизматчилар ота-оналари, дўсту қариндошлари олдида ҳарбий ва Миллий гвардия қасамёдида битилган муқаддас сўзларни тилга олиб, Ўзбекистон Республикаси Конституцияси ва қонунларига содиқликка, ҳарбий низомлар талабларини, командирлар ва бошлиқларнинг буйруқларини сўзсиз бажаришга тантанали равишда ваъда беришди.