Ўзбекистон Республикаси Президентининг 2017 йил 7 августдаги «Миллий кинематографияни янада ривожлантириш чора-тадбирлари тўғрисида»ги қарори ижросини таъминлаш, шунингдек, «Ўзбеккино» миллий агентлиги тизими ташкилотлари бино ва иншоотларини реконструкция қилиш ва жиҳозлаш ишларини жадаллаштиришга қаратилган Ўзбекистон Республикаси Вазирлар Маҳкамасининг 2017 йил 27 декабрдаги 1407-сонли фармойиши эълон қилинди.

Унга кўра, 2018-2021 йилларда «Ўзбекфилм» АЖ ва «Ўзбекистон Республикаси илмий-оммабоп ва ҳужжатли филмлар киностудияси» МЧЖ (объектлар) бино ва иншоотларини замонавий талаблар асосида реконструкция қилиш кўзда тутилган.

Объектлар реконструкцияси бўйича ишларнинг кўлами ва уларни бажариш босқичлари белгилаб олинган. Марказлашган капитал қўйилмаларни қайта тақсимлаш йўли билан объектлар реконструкцияси учун 20,0 млрд. сўм ажратилган.

Объектларнинг реконструцияси учун 58,0 млрд. сўм ҳажмидаги хайрия ёрдамларини жалб қилиш кўзда тутилган, зарур бўлган техник ва кино тасвирга олиш усукуналарининг рўйхати ишлаб чиқилган.

Вазирлар Маҳкамасининг ушбу фармойишига биноан, 2018 йилнинг 31 январигача объектлар қурилиш-монтаж ишларининг биринчи босқичини амалга оширишга, зарур импорт товарларини олишни молиялаштиришга, объектларни лойиҳалаш, реконструкция қилиш ва жиҳозлаш соҳасидаги етакчи, шу жумладан, чет эллик ихтисослашган эксперт ва маслаҳатчиларни жалб қилишга рухсат берилди.

Бундан ташқари, Ўзбекистон Республикаси Инвестиция давлат қўмитаси «Ўзбеккино» МА билан биргаликда 2 ой муддатда объектларни зарур технологик ва кино тасвирга олиш ускуналари билан жиҳозлаш учун халқаро молия институтларини жалб қилиш бўйича таклиф ишлаб чиқади.

Ўзбекистон Республикаси Молия вазирлиги ва Иқтисодиёт вазирлиги 2018 йил ва ундан кейинги йилларда объектларни реконструкция қилиш ва жиҳозлаш ишлари учун ажратмалар билан таъминлайди.

Қолаверса, «Ўзбекенерго» АЖ ва «Ўзтрансгаз» АЖ Тошкент шаҳар ҳокимлиги билан келишилган ҳолда ўз маблағлари ҳисобидан объектларнинг электр ва газ таъминоти тармоқларини лойиҳалаш, қуриш ва реконструкция қилиш ишларини амалга ошириб, Ўзбекистон Республикаси Архитектура ва қурилиш давлат қўмитаси объектларнинг лойиҳа-смета ҳужжатларини давлат экспертизасидан ўтказиши ва қурилиш-монтаж ишларининг сифатини давлат архитектура-қурилиш назоратига олиши белгиланган.