АҚШ президенти Конго Демократик Республикаси ва Руанда ўртасида тинчликка эришиш учун шахсан ўз ҳиссасини қўшди, унинг вакиллари келаси ҳафта Вашингтонда тинчлик шартномасини имзолаши кутилмоқда.

2022 йилдан бери уруш давом этаётган мамлакатлар чоршанба куни келишувни эълон қилди.

«Бу Африка учун ажойиб кун ва очиғини айтганда, дунё учун ажойиб кун!» – деб ёзди Трамп ўзининг Truth Social ижтимоий тармоғида.

«Аммо мен бунинг учун тинчлик бўйича Нобел мукофотини олмайман», – деди Трамп ва ўзининг тинчлик ўрнатиш борасидаги «Ҳиндистон ва Покистон, Сербия ва Косово ўртасидаги урушни тўхтатиш», «Миср ва Эфиопия ўртасидаги тинчликни сақлаш» кабилар учун саъй-ҳаракатлари эътибордан четда қолганини қўшимча қилиб.

«Мен нима қилмай, барибир Тинчлик бўйича Нобел мукофотини беришмайди, жумладан, Россия-Украина ва Исроил-Эрон учун ҳам», - дея хулоса қилди у.

AFP нашри Трамп қолдирган постни изоҳлар экан, у ўзини доим тинчликпарвар сифатида тақдим қилиб келаётгани, бироқ амалда юқоридаги можароларда унинг роли унчалик аҳамиятли бўлиб кўринмаётганини ёзади.

У, шунингдек, Россиянинг Украинага қарши урушини аввалига 24 соат, кейин 100 кун ичида тугатишга ваъда берган, бироқ президент бўлганига беш ой бўлса ҳам, бунга эриша олмади.

Маълумот учун, 2009 йилда АҚШ президенти лавозимидаги ўзидан олдинги президент Барак Обама «халқаро дипломатия ва ҳамкорликни мустаҳкамлашга қаратилган ғайриоддий саъй-ҳаракатлари учун» Тинчлик бўйича Нобел мукофотини олган эди.