Тошкент шаҳри ҳокими Шавкат Умурзаков бошчилигидаги ишчи гуруҳ қиш мавсумидаги юқори юкламалар олдидан электр подстанцияларининг ҳолатини текширди.

Шайхонтоҳур, Юнусобод, Чилонзор, Яшнобод, Миробод ва Сергели туманларига ташриф чоғида ускуналарнинг техник ҳолати, шунингдек, шаҳар энергетика инфратузилмасининг электр энергиясини узлуксиз етказиб беришга тайёрлиги чуқур таҳлил этилди. Аниқланган камчиликлар, жумладан, ускуналарнинг айрим қисмларининг эскиргани ва назоратни кучайтириш зарурати батафсил кўриб чиқилди.

Шавкат Умурзаков масъул тузилмаларга бир қатор аниқ топшириқлар берди. Улар қаторида ускуналарни модернизация қилиш бўйича кечиктириб бўлмайдиган чора-тадбирларни амалга ошириш, профилактик хизмат ва ташкилий чораларни кучайтириш, шунингдек, юзага келиши мумкин бўлган фавқулодда вазиятларга тезкор муносабат билдириш чоралари ҳам бор.

Қиш мавсумида шаҳар электр тармоқларининг барқарор ва ишончли ишлашини таъминлаш мақсадида ушбу топшириқлар бажарилиши алоҳида назоратга олинган.

Шунингдек, ташриф давомида аҳоли мурожаатлари ҳам тингланиб, уларга ечим топиш чоралари кўрилди.