Афғонистонни «Толибон» ўз назоратига олди. Мамлакатни расман ким бошқариши ва янги ҳукуматга кимлар кириши ҳозирча номаълум. Аммо ушбу ташкилотдаги асосий шахслар ҳақида айрим маълумотлар бор.

1. Ҳайбатуллоҳ Охундзода (1961 й.т.) — 2016 йилдан толибларнинг олий қўмондони. Толибларнинг биринчи ҳукмронлиги даврида (1996-2001) у шариат судларидан бирини бошқарган. Ҳарбийдан кўра кўпроқ илоҳиётшунос сифатида ном қозонган. Толиблар орасида қаттиқ консерватор деб ҳисобланади.

2. Абдул Ғани Бародар (1968 й.т.) — Охундзоданинг сиёсий ишлар бўйича ўринбосари. «Толибон»нинг тўртта таъсисчисидан бири. Бош дипломат ва ҳаракатнинг таниқли шахси. «Толибон»нинг биринчи ҳукуматида мудофаа вазирининг ўринбосари бўлган. Кейинчалик у ҳарбий операциялар ва терактларни режалаштиришда муҳим роль ўйнаган ҳамда уларни молиялаштириш учун жавобгар бўлган. Фақат аниқ мақсад билан гапирадиган хотиржам дипломат сифатида таърифланади.

3. Муҳаммад Ёқуб (тахминан 30 ёшда) — Охундзоданинг ҳарбий ишлар бўйича ўринбосари. «Толибон» асосчиси Мулла Умарнинг ўғли. У Бародар билан яхши муносабатда деб ҳисобланади ва у билан бирга ҳаракатнинг нисбатан мўътадил қаноти вакили.

4. Сиражуддин Ҳаққоний (тахминан 45 ёшда) — отасининг вафотидан сўнг, у яратган «Ҳаққоний тармоғи» гуруҳини бошқариб, «Толибон» сафига қўшилган. «Тармоқ» толибларнинг энг уюшган ва жанговар қобилияти юқори қисми ҳисобланади. Ўтган йили New York Timesда чоп этилган мақоласида шундай деган: «Ҳамма урушдан чарчаган. Ишончим комилки, одам ўлдириш ва майиб қилишни тўхтатиш керак».

5. Абдул Ҳаким — илоҳиётшунос, тахминан Охундзоданинг тенгдоши ва унинг яқин сафдоши. У каби, ҳеч қачон дала қўмондони бўлмаган. Прогнозларга кўра, у Афғонистондаги шариат судлари тизимини бошқариши мумкин.