Сурия банкнотларини БАА ва Германияда чоп этишни режалаштирмоқда. Мамлакат миллий валютаси ўн йилдан кўпроқ вақт давомида Россияда босиб келинган.

Reuters  манбасига кўра, Сурия расмийлари банкнотларни босиб чиқаришни БАА ва Германияга кўчириш имкониятларини маълум вақтдан бери ўрганмоқда. Европа Иттифоқи февраль ойида Дамашққа қарши санкцияларни юмшатганидан сўнг расмийларнинг бу йўналишдаги ҳаракатлари кучайган.

Хабар қилинишича, икки немис компанияси аллақачон Сурия фунтларини чоп этишга қизиқиш билдирган. Улар давлат томонидан қўллаб-қувватланадиган Bundesdruckerei ва Giesecke+Devrient хусусий корхоналаридир.

Суриянинг янги маъмурияти, шунингдек, банкнотлардан Суриянинг собиқ президенти Башар ал-Ассад портретини олиб ташлаб, Сурия фунтининг дизайнини ўзгартиришни режалаштирмоқда.

Маълумот учун, Россия 2012 йилдан Сурия банкнотларини чоп этишни бошлаган. Илгари Сурия фунтларини босиб чиқариш Австрия компанияси томонидан амалга ошириларди. Шартнома Европа Иттифоқининг Суриядаги фуқаролар уруши ортидан киритган санкциялари туфайли бекор қилинган.