Ижтимоий тармоқларда хоразмлик бир эркакнинг ўзига яқин (ҳамма маънода!) аёлни автоуловда кийимсиз ҳолатда уяли алоқа воситасида тасвирга олгани, бу лавҳа интернетга чиқиб кетгани-ю пировардида унга (эркакка) нисбатан жиноят иши қўзғатилмаслиги ҳақидаги хабарлар бир неча кундан буён қаттиқ муҳокама қилинмоқда.

Айни ҳолат юзасидан Бош прокуратура тегишли баёнот берган бўлса-да, ҳолатнинг ҳуқуқий жиҳатлари хусусида кенгроқ тасаввур беришга эҳтиёж бордай. Чунки, кўриб-билиб турибмиз: эл оғзига элак тутиб бўлмаяпти.

Алқисса, ушбу ҳолат бўйича оммавий-ахборот воситаларига маълумот беравериб-беравериб чарчамаётган Бош прокуратура матбуот хизмати раҳбари Сурайё Раҳмоновани яна безовта қилишга тўғри келди.

Адлия кичик маслаҳатчиси, минг энсаси қотмасин, босиқлик билан «Xabar.uz»га қуйидагиларни айтди: «...Аввал маълум қилганимиздек, айни ҳолат бўйича Боғот туман ИИБ томонидан терговга қадар текшириш ўтказилиб, шу йилнинг 23 февралида Жиноят процессуал кодексининг 83-моддаси 2-банди ва 325-моддаларига асосан жиноят иши қўзғатиш рад қилинган. Нега? Чунки, фуқаро С.С. (аёл киши) эркакка нисбатан ҳеч қандай даъвоси йўқлиги, у билан 2017 йилдан буён яқин муносабатда бўлиб келаётганлигини кўрсатиб, туман ИИБ бошлиғи номига текшириш ҳаракатларини тўхтатишни сўраб ариза билан мурожаат қилган. Алоҳида таъкидлайман: бу категориядаги жиноят жабрланувчининг аризасини талаб этади. Жабрланувчи буни хоҳламаётган экан, на чора, бу – унинг ҳуқуқи, мунозарага ўрин йўқ. Масала инсон шахсий ҳаётига доҳил экан, унинг (фуқаронинг) розилигисиз ҳеч ким аралаша олмайди. Бунга қонунан изн йўқ.

Афсуски, жамиятимизда шаъни ва қадр-қимматини оёқ ости қилган инсонлар яқинлари бўлганлиги сабабли, жабр кўрган аёлларнинг ўзи зулмкорни оқлаш тенденцияси ҳали ҳануз ниҳоятда катта».