Ўзбекистон шоу-бизнесида рэп йўналишидаги ижоди билан танилган Шоҳрух Шодмонов Тошкент шаҳар Чилонзор тумани кенгашига халқ депутати этиб сайланди. Бу ҳақда хонанданинг ўзи инстаграмдаги расмий саҳифаси орқали маълум қилди.

«Азиз ҳамюртлар! Мана, сизларнинг овозларингиз билан Тошкент шаҳар Чилонзор тумани кенгашига Халқ депутати бўлиб сайландим! Мендан баландпарвоз гапларни кутманг, менинг фикримча, ҳар бир депутат сайланган ҳудудида бор муаммолар билан максимал ишлаши керак, халқ эса (ўзи) баҳо беради. Барчангиздан миннатдорман! Ишончингиз учун раҳмат!» – дея изоҳ қолдирган хонанда.

Шоҳрух Шодмонов аввалроқ мусиқа билан хобби сифатида шуғулланишини, лекин ҳаёт фақат қўшиқлардан иборат эмаслигини ва у юртимиз ривожига ўз ҳиссасини қўшмоқчи эканини билдириб, депутатликка ўз номзодини қўйганини маълум қилганди. У Тошкент давлат иқтисодиёт университети битирувчиси ҳисобланади.

Эслатиб ўтамиз, Олий Мажлис Қонунчилик палатаси ва маҳаллий Кенгашларга бўлиб ўтган сайловнинг дастлабки натижалари кеча эълон қилинганди.