Андроид қурилмалар учун Xabar.uz мобил иловаси. Юклаб олиш ×

Саунадаги интим хизматлар: Юнусободдаги воқеа тафсилотлари очиқланди

Саунадаги интим хизматлар: Юнусободдаги воқеа тафсилотлари очиқланди

Тошкентда бир фуқаронинг жонига қасд қилиш билан қўрқитиб, жанжал кўтарган ва «Chevrolet Equinox» русумли автомобилга зарар етказган зўравонлар суд қилинган эди.

2021 йилнинг 31 октябрь куни тахминан соат 22.00 ларда Юнусобод тумани Боғишамол кўчасида бир нечта фуқаро иштирокида жанжал юз берган, жанжалнинг видеотасвири ижтимоий тармоқларда тарқалиб, кўплаб муҳокамаларга сабаб бўлган эди.

Тошкент шаҳар судлари уларга берилган жазолар ва воқеалар ҳақида батафсил маълумот берган.

Суд 27 июнь куни жиноят ишлари бўйича Юнусобод тумани судида бўлиб ўтган. Ушбу жиноят иши жиноят ишлари бўйича Юнусобод туман суди раиси М.Мирзажонов раислигида кўриб чиқилган.

Аниқланишича, Ж. А., М. Х., С. М., С. Х. ва дастлабки терговда аниқлашнинг имкони бўлмаган шахслар ўзаро жиноий тил бириктириб, бир гуруҳ бўлиб, 2021 йил 31 октябрь куни соат 22:00 ларда, инсон ҳаёти ва саломатлигига жиддий зиён етказувчи ўткир тиғли ханжар (пичоқ) ва бошқа буюмлар билан қуролланиб, Тошкент шаҳри, Юнусобод тумани, Боғишамол кўчасида жойлашган «СамПИ» савдо мажмуаси олдида Ж. И., А. Т., А. К., С. А. ва Д. М. ни ўлдириш ва зўрлик ишлатиш билан қўрқитиш мақсадида уларга ҳужум қилиб, ўлдириш ва жиддий тан жароҳати етказилишини намоён этувчи фаол ҳаракатларни амалга оширганларида, бундан хавфсираган Ж. И., А. Т., А. К., С. А. ва Д. М. ҳодиса жойидан қочиб яширинган.

Б. Т. Тошкент вилояти, Юқорчирчиқ тумани, Ийк ота МФЙ, Бахт кўчаси, 41-уйда жойлашган «Шодлик» номли кўнгилочар масканнинг ҳаммом-саунасида маъмур бўлиб ишлаб, 2021 йил ноябрь ойининг бошларида С. М. билан ўзаро жиноий тил бириктириб, мазкур кўнгилочар маскани иш юритувчиси Д. Ш.нинг кўрсатма ва талабларига зид равишда, фараз қилинган ҳуқуқларни ўзбошимчалик билан амалга ошириб, ўзларини кўнгилочар маскани ҳаммом-саунаси эгасидек тутиб, ушбу ҳаммом-саунада фоҳишахона ташкил қилиб, у ерга келган мижоз ва хизмат кўрсатувчи фоҳишалик билан шуғулланувчи аёллар ўртасида улар томонидан қўйилган талабларга риоя этилишини таъминлаб, Д. Ш.нинг қонун билан қўриқланадиган манфаатларига жиддий зиён етказганлар.

Бундан ташқари, С. М. билан Б. Т. ўзларининг жиноий ҳаракатларини давом эттириб, саунада фоҳишахона ташкил этиб, ташриф буюрган мижозлар томонидан тартибга риоя этилишини таъминлаб, 2021 йил ноябрь ойининг бошларидан 2021 йил 1 декабрь кунига қадар мижозларга Р. А., Н. С., У. Я., Р. А., А. В. ва бошқа аёлларнинг шаҳвоний хизматларини таклиф қилиш йўли билан пул эвазига уларга жинсий алоқа учун шароит яратиб бериб, кўрсатилган интим хизматлар учун ҳар бир мижоздан олинган 200 000 сўм миқдоридаги пуллардан 50 000 сўмини улуш сифатида қўлга киритиб келганлар.

Эълон қилинган суд ҳукмига кўра, Ж.А. Жиноят кодексининг 112-моддаси (ўлдириш ёки зўрлик ишлатиш билан қўрқитиш) 1-қисмида назарда тутилган жиноятни содир этганликда айбли деб топилиб, унга иш ҳақининг 20 фоизи миқдорини давлат даромади ҳисобига ушлаб қолган ҳолда 1 йил муддатга ахлоқ тузатиш ишлари жазоси тайинланган. Жиноят кодексининг 62-моддаси (ушлаб туриш, қамоққа олиш ёки уй қамоғи вақтини ҳисобга олиш қоидалари) га асосан Ж.А.ни 2021 йил 6 ноябрдан 2022 йил 27 июнга қадар қамоқда сақланганини эътиборга олиб, тайинланган ахлоқ тузатиш ишлари жазосини тўлиқ ўтаган деб ҳисобланиши белгиланиб, унга нисбатан қўлланилган «қамоққа олиш» тарзидаги эҳтиёт чораси бекор қилинган ва у суд залида озод қилинган. Ҳукм қонуний кучга киргунга қадар Ж.А. га нисбатан «муносиб хулқ-атворда бўлиш ҳақидаги тилхат» тарзидаги эҳтиёт чораси қўлланилган.

М.Х. га нисбатан Жиноят кодексининг 248-моддаси (ўқотар қуролнинг, ўқ-дориларнинг, ўқотар қурол асосий қисмларининг, портловчи моддаларнинг, портлатиш воситаларининг ёки портлатиш қурилмаларининг қонунга хилоф муомаласи) 1-қисми билан юритилган жиноят иши Жиноят-процессуал кодексининг 84-моддаси (айблилик тўғрисидаги масалани ҳал қилмай туриб жиноят ишини тугатиш учун асослар) 5-қисми 2-бандига асосан айблилиги тўғрисидаги масалани ҳал қилмай туриб ҳаракатдан тугатилган. М.Х. Жиноят кодексининг 112-моддаси 1-қисмида назарда тутилган жиноятни содир этганликда айбли деб топилиб, унга иш ҳақининг 20 фоизи миқдорини давлат даромади ҳисобига ушлаб қолган ҳолда 1 йил муддатга ахлоқ тузатиш ишлари жазоси тайинланган. Жиноят кодексининг 60 (бир неча ҳукм юзасидан жазо тайинлаш) ва 61 (жазоларни қўшишнинг ҳисоблаш қоидалари) моддалари тартибида тайинланган жазога жиноят ишлари бўйича Мирзо Улуғбек туман судининг 2020 йил 5 июндаги ҳукмига кўра тайинланган жазонинг ўталмай қолган қисмини қисман қўшиш йўли билан М.Х. га узил-кесил ўташ учун 1,5 йил муддатга озодликни чеклаш жазоси тайинланган. Жиноят кодексининг 62-моддасига асосан М. Х. Ни 2021 йил 6 ноябрдан 2022 йил 27 июнга қадар 7 ой 21 кун қамоқда сақланганини эътиборга олиб, тайинланган озодликни чеклаш жазосидан чегириб ташланган ҳамда узил-кесил 10 ой 9 кун муддатга озодликни чеклаш жазоси қолдирилган. М.Х. га нисбатан қўлланилган қамоққа олиш тарзидаги эҳтиёт чораси бекор қилиниб, у суд залида озод қилинган. Ҳукм қонуний кучга киргунга қадар М. Х.дан тилхат олинган.

С.М. Жиноят кодексининг 112-моддаси 1-қисми, 131-моддаси (қўшмачилик қилиш ёки фоҳишахона сақлаш) 3-қисми ва 229-моддаси (ўзбошимчалик) да назарда тутилган жиноятни содир этганликда айбли деб топилиб, унга Жиноят кодексининг 59 (бир неча жиноят содир этганлик учун жазо тайинлаш) ва 61-моддалари тартибида тайинланган жазоларни қисман қўшиш йўли билан узил-кесил 3,5 йил муддатга озодликдан маҳрум қилиш жазоси тайинланган. Жазони қаттиқ тартибли колонияларда ўташ белгиланган.

Б.Т. Жиноят кодексининг 131-моддаси 3-қисми ва 229-моддасида назарда тутилган жиноятни содир этганликда айбли деб топилиб, унга Жиноят кодексининг 59 ва 61-моддалари тартибида тайинланган жазоларни қисман қўшиш йўли билан узил-кесил 3 йил 3 ой муддатга озодликдан маҳрум қилиш жазоси тайинланган. Жазони манзил-колонияларда ўташ белгиланган. Б.Т. га нисбатан қўлланилган гаров қамоққа ўзгартирилиб, суд залида қамоққа олинган.

С. Х. Жиноят кодексининг 112-моддаси 1-қисмида назарда тутилган жиноятни содир этганликда айбли деб топилиб, унга иш ҳақининг 20 фоизи миқдорини давлат даромади ҳисобига ушлаб қолган ҳолда 1 йил муддатга ахлоқ тузатиш ишлари жазоси тайинланган. Жиноят кодексининг 60 ва 61-моддалари тартибида тайинланган жазога жиноят ишлари бўйича Каттақўрғон шаҳар судининг 2021 йил 25 январдаги ҳукми билан тайинланган жазонинг ўталмай қолган қисмини қисман қўшиш йўли билан С.Х. га узил-кесил базавий ҳисоблаш миқдорининг 50 баравари, яъни 11 150 000 сўм жарима ва 2 йил 7 ой муддатга озодликни чеклаш жазоси тайинланган. Тайинланган жарима С.Х. томонидан 2021 йил 2 февраль куни тўлиқ тўлангани инобатга олинган. Жиноят кодексининг 62-моддасига асосан С.Х. ни 2022 йил 4 апрелдан 2022 йил 8 апрелга қадар 4 кун қамоқда сақлангани эътиборга олиниб, тайинланган озодликни чеклаш жазосидан чегириб ташланган ҳамда узил-кесил 2 йил 6 ой 26 кун муддатга озодликни чеклаш жазоси қолдирилган.

Изоҳлар

Изоҳ қолдириш учун сайтда рўйхатдан ўтинг

Кириш

Ижтимоий тармоқлар орқали киринг