Сурхондарё вилоятида жойлашган «Сариосиё» аэропортида реконструкция ишлари якунланди. 29 апрель куни мазкур аэропорт биринчи техник парвозни амалга оширди. Бу ҳақда Uzbekistan Airports матбуот хизмати хабар берди.

Таъкидланишича, аэропорт 1976 йилдан бери фаолият юритиб келаётган учиш-қўниш йўлаги ва бошқа инфратузилмаларнинг эскиргани сабабли капитал таъмирдан чиқарилди. 1550 метр узунликда ва 35 метр кенгликдаги учиш-қўниш йўлагининг асфальтобетон қопламаси икки қатламда янгиланди. Шунингдек, рулеж йўлаклари ва иккита ATR-72-600 турдаги самолётларни қабул қила оладиган перрон ҳам таъмирланди.
Бугунги техник парвоз SilkAvia авиакомпаниясининг ATR-72-600 самолёти орқали амалга оширилди. Бу парвоз аэродромнинг парвозларни қабул қилишга тўлиқ тайёр эканини намоён қилди.

Айни пайтда, аэропорт ҳудудида 100 нафаргача йўловчи сиғдира оладиган янги терминал қурилиши якунланмоқда. Барча ишлар тугагач, бир ой ичида «Сариосиё» аэропортида мунтазам парвозлар йўлга қўйилиши режалаштирилган.

Маълумот ўрнида, «Сариосиё» сўнгги йилларда фаолияти қайта тикланган бешинчи минтақавий аэропорт бўлди. Аввалроқ Муйноқ, Қўқон, Шаҳрисабз ва Зомин аэропортлари ҳам реконструкция қилиниб, ишга туширилган эди.