Бандлик ва меҳнат муносабатлари вазирлиги хорижда қийин аҳволда қолган фуқароларимизни Ўзбекистонга қайтариш бўйича ишларни бошлади.

Юртдошларимизнинг 71 кишидан иборат биринчи гуруҳи 12 октябрь куни соат 16:55 ва 22:35да «Ўзбекистон Ҳаво Йўллари» қатнови билан Москвадан Тошкентга етиб келди. Уларни аэропортда қариндошлари, Бандлик ва меҳнат муносабатлари вазири Шерзод Кудбиев, шунингдек, Ташқи меҳнат миграцияси масалалари агентлиги вакиллари кутиб олишди.

Ўзбекистон Республикаси Президентининг 2018 йил 5 июлдаги «Ўзбекистон Республикасининг ташқи меҳнат миграция тизимини янада такомиллаштириш бўйича қўшимча чора-тадбирлар тўғрисида»ги қарори билан Хорижда меҳнат фаолиятини амалга оширувчи шахсларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси ташкил этилди.

Жамғарманинг асосий вазифаларидан бири хорижда меҳнат фаолиятини амалга ошириш давомида шахсини тасдиқловчи ҳужжатларсиз ва яшаш учун маблағларсиз қолган, оғир моддий аҳволга учраган фуқароларга ҳуқуқий ва ижтимоий ҳимоя, шунингдек, моддий ёрдам кўрсатиш ҳисобланади.

2018 йил 5-8 сентябрь Москва шаҳрида бўлиб ўтган Ўзбекистон Республикаси ва Россия Федерацияси ўртасидаги иқтисодий ҳамкорлик бўйича Ҳукуматлараро комиссиясининг 19-кенгашида Россия Федерацияси Ички ишлар вазирлиги ҳудудий органларининг Хорижий фуқароларни вақтинчалик сақлаш марказларидаги тахминан 1500 нафар Ўзбекистон Республикаси фуқароларини қайтаришга кўмаклашиш ҳақида келишувга эришилган эди.

Таъкидланган тоифадаги шахслар – бу оғир моддий қийинчиликка учраган, шахсини тасдиқловчи ҳужжатларга ва яшаш учун маблағга эга бўлмаган Ўзбекистон Республикаси фуқароларидир.

Таъкидланган тоифадаги шахсларни қайтариш билан боғлиқ ташкилий ишлар Ўзбекистон Республикаси Бандлик ва меҳнат муносабатлари вазирлиги ҳузуридаги Хорижда меҳнат фаолиятини амалга оширувчи шахсларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси ҳисобидан амалга оширилади.