Перунинг собиқ президенти Олянта Умала ва унинг рафиқаси Надин Эредия 15 йилга озодликдан маҳрум этилди. Бу ҳақда BBC хабар берди.

Президент ва хотини коррупцияда айбдор деб топилди, улар икки сайловолди кампаниясини молиялаштириш учун Бразилиянинг Odebrecht қурилиш компанияси ҳамда Венесуэла ҳукуматидан пул олган.

Ҳукм эълон қилинганидан сўнг, суд залининг ўзида Умаланинг қўлига кишан солинди. Судя унинг судда қатнашмаган рафиқасини ҳам ҳибсга олишни буюрди, кейин маълум бўлишича, Надин Эредия пойтахт Лимадаги Бразилия элчихонасидан бошпана топган, деб ёзди AFP.

Олянта Умала 2011–2016 йилларда Перу президенти бўлган. 2022 йилда Odebrecht билан боғлиқ улкан коррупция можароси доирасида судга чақирилган, бу ишга бошқа собиқ президентлар ҳам алоқадор бўлиши мумкин.

Перу собиқ президенти Алан Гарсия (1985–1990 ва 2006–2011 йиллар) 2019 йилда полиция ҳибсга олиш учун келганида ўз жонига қасд қилган. Яна бир собиқ президент Алехандро Толедо (2001–2006) миллионлаб пора олгани учун ўтган йили 20 йилга қамалганди.

Перунинг 2016–2018 йиллардаги президенти Педро Пабло Кучинскининг тергови ҳали давом этмоқда.