Президент Шавкат Мирзиёев 7 май куни ўтказилган видеоселектор йиғилиши бошида коронавирус пандемиясига қарши кураш борасида мамлакатимизда амалга оширилаётган ишларга алоҳида тўхталиб ўтди.

«Ҳозирда кўп давлатларда фуқароларимиз бор. Биз тизимли равишда, имкониятимизга қараб уларни барибир олиб келишни бошлашимиз керак. Олиб келишни бошладик ҳам режа билан Россиядан, Туркиядан, Дубайдан ва бошқа давлатлардан. Шуларнинг 11 мингга яқини анча қийналган, уларни биринчи навбатда олиб келамиз. Лекин ҳамма билиши лозим: келганларнинг ичида касалликлар аниқланяпти, бунга тайёр туришимиз керак», – деди Шавкат Мирзиёев.

Шунингдек, президент жуда катта куч сарфлаб, кўп саъй-ҳаракатлар, халқимизнинг кўмаги ва чуқур тушуниши, сабр-тоқати билан Ўзбекистонда бу офатни жиловлаб турганимизни алоҳида таъкидлади. Шунинг учун жуда ҳам зийраклик ва эҳтиёткорлик билан, карантин қоидаларига тўлиқ амал қилишимиз шартлигини уқтирди.

Давлат раҳбари барча давлатлар карантин чораларига қаттиқ амал қилиш билан бирга иқтисодиётни тиклаш бўйича қаттиқ кураш олиб бораётганини, ҳозир ҳеч кимга осон эмаслигини, бирорта давлатнинг ўзининг рецепти йўқлигини қайд этди.

«Бизнинг хато қилишга, хотиржамликка берилишга ҳаққимиз йўқ», деди президент.

«Бухородаги, Сардобадаги ҳодисалар бизга сабоқ бўлиши керак. Қайси шаҳарда, туманда пандемияга қарши курашда кўзбўямачиликка йўл қўйилса, хайрлашамиз ким бўлишидан қатъи назар... Тиббий ниқобни ечиш ман этилади. Шу шароитда яшаш ва ишлашга ўрганишимиз керак», – таъкидлади Шавкат Мирзиёев.