Ўзбекистон ташқи ишлар вазирлиги кечадан бери Кобулда содир бўлаётган терактларга ўз муносабатини билдирди.

«Ўзбекистон Кобул шаҳрида содир этилган ва кўплаб инсонларнинг ҳаётига зомин бўлган террористик хуружларни қатъиян қоралайди.

Афғонистондаги барча томонларни миллий ярашув ва келишувга эришиш, кўп миллатли Афғонистон халқи манфаатлари йўлида мамлакатда барқарор ва узоқ муддатли тинчлик ўрнатиш мақсадида босиқлик ва конструктив ёндошув намоён этишга чорлаймиз.

Ушбу шафқатсиз ҳужумларда қурбон бўлганлар ва жабр кўрганларнинг оилаларига самимий ҳамдардлик изҳор этамиз.

Ўзбекистон бундан кейин ҳам афғонлараро сиёсий жараённи ҳар томонлама қўллаб-қувватлаб, Афғонистонда тинчлик-осойишталик ва фаровонликка эришишда кенг кўламли ёрдам кўрсатишда давом этади», дейилади ТИВ баёнотида.

Кобулда кеча 4 та, бугун эса 5 та портлаш содир бўлган. Уларнинг барчасини ИШИД ўз бўйнига олган ва терактлар ҳали давом этиши мумкинлиги қайд этилган.