Аргентиналик собиқ футболчи, ҳозирда «Химнасия ва Эсгрима» клуби бош мураббийи Диего Марадонанинг шифохонага ётқизилиш сабаби маълум бўлди. Бу ҳақда «Associated Press» хабар берди.

Спортчининг вакили аргентиналик депрессияга қарши даволанаётганини айтди. Охирги ҳафта Марадона маъюс бўлиб қолди ва овқатланишдан бош тортди. Футболчи 60 ёшга тўлганидан уч кун ўтиб, яъни 2 ноябрь куни шифохонага ётган. Мураббийнинг атрофидагилар Марадонанинг коронавирусга чалиниши билан боғлиқ миш-мишларни рад этмоқда.

31 октябрь куни Марадона Россия президенти Владимир Путинга ишонишини маълум қилганди. Спортчи коронавирус вакцинасининг тезроқ пайдо бўлишидан умид қилмоқда. Собиқ ўйинчининг айтишича, бутун дунё айнан Россия препаратларидан фойдаланишади.

Марадона — Аргентина терма жамоаси сафида жаҳон чемпиони. У, шунингдек, «Барселона», «Наполи» ва «Бока Хуниорс»даги ўйинлари билан танилган. Спортдаги карьерасини тугатгач аргентиналик бир қанча клубларга раҳбарлик қилган. 2019 йилда у «Химнасия»ни қабул қилиб олди.