Санкт-Петербург (Россия)да таниқли олим Александр Каганский мудҳиш ҳодиса қурбони бўлди.

Полицияга хабарни етказган аёлнинг гувоҳлик беришича, у ярим яланғоч эркак уйнинг 14-қаватидан пастга тушиб кетганини ўз кўзлари билан кўрган. Воқеа жойига етиб келган полиция ҳодимлари марҳумнинг шахсини аниқлашди. Унинг танасида куч ишлатиш изларини аниқлашган. Россия тергов қўмитаси ҳодиса юзасидан жиноий иш очгани айтилмоқда.

45 ёшли биолог олим ташқи омилларнинг генларга таъсирини ўрганган, онкологик касалликларга қарши дорилар яратишда иштирок этган, қолаверса, COVID-19га сабаб бўлувчи коронавирусни ўрганувчи тадқиқот гуруҳи аъзоси эди.

Дастлабки маълумотларга кўра, Россия шимолий пойтахтига Каганский Буюк Британиядан келган — Эдинбург университетида синтетик эпигенетика лабораториясини бошқарган. Питерга ота-онасининг қабрини зиёрат қилишга келган экан. Шунингдек, синфдошини ҳам йўқлаган, терговнинг дастлабки маълумотларига кўра, сабоқдошининг хонадонида ўзаро низо келиб чиққан ва ҳалокатга сабаб бўлган.

Александр Каганский дунё даражасидаги биолог олим эди. Онкогенез, саратон тадқиқотлари билан шуғулланган, Ернинг био хилма-хиллигини ўрганиш ва сақлаб қолиш халқаро ҳаракатининг ёрқин намояндаларидан саналган. Петербург, Владивосток, Вашингтон ва Эдинбург университетларида фаолият олиб борган.

Сўнгги ойларда Эдинбургда коронавирусга қарши вакцина ишлаб чиқиш гуруҳида ишлаётганди, дейилади, хабарда.