Коронавирусга чалинган аёл эрини рашк қилиб, қутулишга уриняпти дея гумон қилган. Шундан сўнг у эрига ҳужум қилиб, унга ҳам вирусни юқтириш мақсадида тупура бошлаган. Ҳодиса Туркиянинг Самсун вилоятида содир бўлди, деб ёзади «Hurriyet Daily News».

Мустафо исмли киши рафиқаси шифокор бўлиб ишлашини маълум қилди. Шифохонада у коронавирусни юқтириб олган. Аёл уйда даволанган, эри эса уни парвариш қилган. Эркак кишининг коронавирусга топширган тест натижаси манфий чиққан.

Эркакнинг туғилган кунида синглиси қўнғироқ қилган. Уларнинг суҳбатига қулоқ солиб турган аёл бирдан жаҳли чиқа бошлаган. Эри телефонда у ҳақида гапириб, ундан қутулишга уриняпти, деган хаёлга борган. Шундан сўнг турмуш ўртоғига коронавирусни юқтириш мақсадида унга қараб тупган. Бу ҳам етмагандек, уни тишлашга, қўлларини оғзига солишга уринган.

Жанжалдан кейин эркак хотинининг устидан прокуратурага шикоят қилди.

«У илгари ҳам мени урган, аммо ҳеч қачон арз қилмагандим. Энди тоқатим тоқ бўлди. У менга ёки беморларига зарар етказиб қўйишидан хавотирдаман», — деб изоҳлади Мустафо.

«Бу мамлакатда нафақат аёллар, балки эркаклар ҳам оиладаги зўравонлик қурбони бўлиши мумкин. Ортга чекиниш ниятим йўқ», — дея хулоса қилди у.