Уруш ўз номи билан уруш, қурбонлар ҳар икки томондан ҳам берилади. Ҳар қандай урушда ғолиб бўлмайди, деган ибора ана шу жиҳатга аталган.

Россия «Ғалаба бизнинг қўлимизда» деб жар солаётган, Украина «Енгилмаймиз» деб турган бир пайтда икки томондан ҳалок бўлган йигитлар сони кам эмас. 

Украина Президенти офиси раҳбари Андрей Ермак телеграмм каналида маълум қилишича, Россия ва Украина ҳалок бўлган жангчилари жасадларини алмашишган. Хабарда Россия билан музокаралар осон кечмагани таъкидланган.

Маълум қилинишича, Украина Россияга 62 рус аскари жасадини қайтарган. Ўз навбатида, Россия Украинага қанча жасадни бергани айтилмаган. Шунингдек, алмашиниш манзили, мутасаддилар борасидаги маълумотлар ҳам маълум қилинмади.

Украинанинг ҳарбий асирлар ишлари бўйича махсус штаб телеграмм каналида эса 32 нафар украиналик ҳарбий асирликдан озод қилингани, уларни Россия Украинага топширгани маълум қилинган.  Озодликка чиққан ҳарбийларнинг 3 нафари офицер, 28 нафари оддий аскар ва бир нафари денгизчи, энг кичиги 22 ва энг каттаси 51 ёшда. Асирларнинг кўпчилиги ҳақида уларнинг яқинларига «бедарак йўқолган» деб айтилган.

Махсус штаб кейинги алмашинувларга тайёргарлик кўрилаётганини  таъкидлаган.

Россия томони ҳозирга қадар мавзуга оид бирор баёнот бермаган.