АҚШ президенти Дональд Трамп Украина Россиянинг тўғридан-тўғри музокара ўтказиш бўйича таклифига рози бўлиши кераклигини билдирди.

У ўзининг «Truth Social» ижтимоий тармоғида шундай ёзди:
«Камида, улар келиша оладими, йўқми, шунга аниқлик кирита олади. Агар келиша олмаса, Европа етакчилари ва АҚШ вазиятни тушуниб, шунга мос ҳаракат қилишлари мумкин!»

Трамп, шунингдек, Киевнинг музокараларга тайёрлигига шубҳа билдирди ва қуйидагиларни қўшимча қилди:
«Мен Украина Путин билан келишувга боради, деб шубҳалана бошладим. Путин эса Иккинчи жаҳон урушидаги ғалабани нишонлаш билан жуда банд. Бу уруш АҚШсиз ютилишининг иложи йўқ эди (ҳатто яқин ҳам келолмасди!)»

«УЧРАШИНГ, ҲОЗИРОҚ!!!» — дея таъкидлади Оқ уй раҳбари.

Украина президенти Владимир Зеленский эса Россиядан 12 майдан оташкесимга риоя қилишни кутаётганини ва 15 май куни шахсан Путинни Туркияда кутаётганини маълум қилди.

«Биз эртадан бошлаб тўлиқ ва узоқ муддатли оташкесимни кутяпмиз — бу дипломатия учун зарур асос бўлади. Ва мен Путинни пайшанба куни Туркияда кутаман», — деб ёзди Зеленский ўзининг Telegram-каналида.