Экологик экспертиза режалаштирилаётган ёки амалга оширилаётган хўжалик ва бошқа фаолият турининг экологик талабларга мувофиқлигини белгилаш, уни амалга ошириш мумкин ёки мумкин эмаслигини аниқлашдир.

Экологик экспертизадан мақсад тегишли фаолиятнинг экологик талабларга мувофиқлигини, агар бу фаолият тури атроф табиий муҳит ҳолатига ва фуқаролар соғлиғига салбий таъсир кўрсатиши мумкин бўлса ёки таъсир кўрсатаётган бўлса, унинг экологик хавфлилик даражасини аниқлашдир. Шунингдек, атроф муҳитни муҳофаза қилиш ва табиий ресурслардан оқилона фойдаланишга қаратилган тадбирлар етарли даражада амалга оширилаётганлигига ҳам эътибор қаратилади.

Қуйидаги объектлар давлат экологик экспертизасидан ўтказилади:

— давлат дастурлари, концепциялари, ишлаб чиқариш кучлари, иқтисодий ва ижтимоий соҳа тармоқларини жойлаштириш ҳамда ривожлантириш схемалари лойиҳалари;

— барча турдаги қурилишлар учун ер участкаларини ажратиш материаллари;

— лойиҳаолди ва лойиҳа ҳужжатлари;

— табиий ресурслардан фойдаланиш билан боғлиқ, хўжалик ва бошқа хил фаолиятни тартибга солувчи норматив-техник ва йўриқнома-услубий ҳужжатлар лойиҳалари;

— техника, технология, материаллар, моддалар, маҳсулотларнинг янги турларини яратишга доир ҳужжатлар;

— атроф муҳит ҳолатига ва фуқаролар соғлиғига салбий таъсир кўрсатувчи ишлаб турган корхоналар ва бошқа объектлар;

— муҳофаза этиладиган табиий ҳудудлар, фавқулодда экологик вазият ва экологик офат зоналари мақомини бериш мақсадида ўтказилган ҳудудларни комплекс текшириш материаллари;

— шаҳарсозлик ҳужжатларининг барча турлари;

— махсус ҳуқуқий режимли объектлар.

Ўзбекистон Республикасининг “Экологик экспертиза тўғрисида”ги Қонуни ушбу соҳадаги асосий ҳуқуқий ҳужжат ҳисобланади. Қонунга кўра, маълум турдаги фаолият ёки объектлар экологик экспертизадан ўтказилиши мажбурий ҳисобланади.