Эчкиэмарга нос чектирган фуқаро жазоланди.

Бухоро вилояти Жондор туманида 2005 йилда туғилган фуқаро Сарвар Ҳамидов (исм,фамилия ўзгартирилган) “Қизил китоби”га киритилган бўз эчкиэмарнинг оғзига носвой солиб, унга нисбатан шафқатсиз муносабатда бўлиб ўлдирганлиги аниқланиб унга нисбатан тегишли тартибда маъмурий баённома расмийлаштирилган.

Суд залида, ҳуқуқбузар С.Ҳамидов чўл массивида жойлашган дала шийпонига ўзининг қўйларини қамаш учун келганлигини, у ерда эчкиэмарни кўриб қолганлигини, уни бошига таёқ билан уриб қўлига ушлаб олганлигини, кейин унинг оғзига мажбурлаб носвой солганлигини, эчкиэмар 10-15 дақиқа хушсиз ҳолатда қолиб кейинчалик юриб кетганлигини айтган.

Шундан сўнг эчкиэмарни олиб кўл қирғоғига отиб юборганлигини, бу ҳолатларни ўзининг шахсий телефонига видеога олиб, инстаграм ижтимоий тармоғига жойлаштирилганлигини, эчкиэмарни ўлдирмаганлигини, лекин унга нисбатан шафқатсиз муносабатда бўлганлигини тан олишини, айбига иқрорлигини, қилмишидан пушаймонлигини инобатга олиб қонуний енгиллик берилишини сўраб кўрсатма берди.

Унга нисбатан Маъмурий жавобгарлик тўғрисидаги кодекснинг 111-моддаси 1-қисми билан базавий ҳисоблаш миқдорининг 4 баравари яъни 1.500.000 сўм жарима жазоси тайинланди.