Коронавирус пандемиясининг таъсирини юмшатишга қаратилган инновацион воситалар ва ечимлар учун «COVID-19 Challenge 2020» онлайн танловида иштирок этиш учун икки ҳафта ичида жами 600та ариза топширилди. Улардан рус тилида — 285 та, ўзбек тилида — 315 та.

«COVID-19 Challenge 2020» — COVID-19 пандемиясининг таъсирини юмшатишга қаратилган инновацион воситалар ва ечимлар учун онлайн танлов бўлиб, унда Ўзбекистоннинг барча ҳудудларидан инноваторлар COVID-19 пандемиясидан азият чекканларга ёрдам бериш учун билим, технология, тадбиркорликни бирлаштириб, ҳамкорликда инновацияларни яратишлари мумкин.

Танловга аризалар 7 апрелдан 20 апрелгача қабул қилинди. Аризаларни кўриб чиқиш ва онлайн суҳбат 24 апрель куни ўтказилади. Танланган лойиҳаларни синовдан ўтказиш ва эълон қилиш эса 30 апрель кунига мўлжалланган.

Қизиқадиган шахслар ва компаниялар рўйхатдан ўтиш ва таклиф этилаётган технологик ечим ғоясини онлайн шаклни тўлдириш орқали тақдим этишлари сўралади. Аризалар қабул қилингандан кейин лойиҳалар кўриб чиқилади. Муваффақиятли ғоя ва лойиҳалар муаллиф ва жамоалари онлайн суҳбатга таклиф этиладилар. Камида 5та танланган лойиҳани синовдан ўтказиш ва таклиф қилинган технологик ечимларни амалга ошириш учун ҳамкорлар томонидан тақдим этилган 10 минг АҚШ долларигача бўлган молиявий маблағ билан таъминланади. Танланган лойиҳалар бошқа платформаларда ҳам кенг намойиш этилади.

Аризалар қуйидаги йўналишлари бўйича топширилган:

1. Соғлиқни сақлаш — 123 та;
2. Ёрдамга муҳтож аҳолига кўмаклашиш — 48 та;
3. Кичик бизнесни қўллаб-қувватлаш — 130 та;
4. Жамоатчиликни қўллаб-қувватлаш — 21 та;
5. Таълим — 136 та;
6. Хабардорликни ва хулқ-атворни яхшилаш — 32 та;
7. Ҳордиқ — 35 та;
8. Қолган барчаси — 75 та;

Батафсил маълумот олиш учун танливнинг веб-сайтига киринг: http://covid-19challenge.it-park.uz/