Президент Шавкат Мирзиёев айни вақтда Олмалиқ шаҳрида бўлиб турибди. Давлат раҳбари ташриф давомида «Ёшлик 1» конини ўзлаштириш лойиҳаси билан танишди ва фаоллар билан учрашди.

Президент учрашув вақтида юртимизда топилаётган ерости бойликлари ҳақида гапириб ўтди, дея хабар бермоқда Xabar.uz мухбири.

— Охирги вақтларда геологияга бўлган эътибор пасайиб кетгани учун шунча бойлигимиз борлигини ўзимиз ҳам билмаган эканмиз. Геология бўйича олиб борилган ишлар туфайли Олмалиқнинг ўзида катта-катта бойликлар аниқланди. Агар Навоийда олтин захираси 3 минг тоннадан ошмаса, Олмалиқда 5 минг тонна бор. Истиқбол жуда катта, — деди Шавкат Мирзиёев.

Президент ўз нутқи давомида йиғилиш қатнашчиларига мурожаат қилди ва: «Сиз ҳали қанчалик бой эканингизни билмайсиз», — деди. Давлат раҳбари мисни қайта ишлаш учун учинчи корхона қурилаётгани гапириб ўтди ҳамда яқин вақтлар ичида тўртинчи ва бешинчи корхона ҳам бунёд этилишини таъкидлаб ўтди.

— Дунё иқтисодида мисга бўлган эътибор кучайиб бормоқда. Битта электромобилга қанча мис кетишини ҳисоблаб чиқсангиз ҳам буни билиб олиш мумкин. Шу вақтга қадар мисни қайта ишлаш анча оқсаб қолган эди, Олмалиқда иккита корхона бўлган ва уларнинг ҳам ускуналари эскириб кетган. Биз учинчи мисни қайта ишлаш корхонасига тамал тоши қўйдик. Мен керакли топшириқларни берганман, бир ой ичида тўртинчи ва бешинчи корхоналар қурилишини бошлашни режалаштириб қўйдик, — деди Шавкат Мирзиёев.

Президент шунингдек яшил энергетиканинг иқтисодиётдаги ўрни ҳақида ҳам гапириб ўтди.

— Хозир бутун дунё яшил иқтисодиётга ўтмоқда. Яқинда Корея Республикасига бориб келдим, улар билан ҳамкорлик бўйича кўплаб келишувларга эришдик.

Кореяда ерости бойликлари йўқ, аммо дунёнинг кучли ўнлигига кирадиган кучли иқтисоди бор. Бундан олтмиш йил олдин Кореяда ҳеч нарса бўлмаган. Аммо билим туфайли ривожланиб кетди.

Кореяликлар ўз ускуналарни Олмалиққа ўрнатишга рози, аммо энергиянинг неча фоизини яшил энергетикадан олинишига қизиқишди. Яқин вақтлар ичида 25 фоиз қувватни яшил энергетикадан олишимизни айтгандик, келишга рози бўлдилар, — деди давлат раҳбари.

Шавкат Мирзиёев шунингдек мис экспорти истиқболи ҳақида маълумот бериб ўтди. Давлат раҳбарининг таъкидлашича, мис экспорти 1,5 миллиард долларга етказилиши мумкин. Бунинг учун мега лойиҳалар амалга оширилади, аммо уларда ишлай оладиган билимли ёшларга катта эҳтиёж пайдо бўлади.

— Биз янги корхоналарга янги ускуналар олиб келамиз. Бу корхоналарда билимли, информацион технологиялардан хабари бор ёшлар керак бўлади. Биз бу мега лойиҳалар учун катта маблағ сарфламоқдамиз ва бунинг учун етти ўлчаб, бир кесмоқдамиз. Хозир келажак 100 йил учун аҳамиятли бўлган иқтисодга асос солмоқдамиз, — деди Мирзиёев.

Президент томонидан таъкидланишича, учинчи мисни қайта ишлаш корхонаси қурилиши Мустақиллик байрамига қадар якунланиши режалаштирилган.