Энергетика вазирлиги Намангандаги тендер бўйича берилган таклиф қайта кўриб чиқилиши ортидан пайдо бўлган айрим саволларга тушунтириш берди. 

Вазирликка кўра, ўтказилган тендер тартиби бўйича унда ким қанча таклиф берганини аввалдан билиб бўлмайди. Таклиф конвертлари очилгандан сўнг билинади.

Таклиф конвертлари очилганда эса Намангандаги ушбу лойиҳага Хитой компанияси бошқа компанияларга қараганда энг кам тариф берган.

«Лекин унинг шу таклифи қиммат ҳисобланади», – дейилади вазирлик изоҳида.

Қайд этилишича, вазирлик бошқа компаниялар ичида ушбу компаниянинг кам тариф таклифи бергани хабарини берган, холос. Кейинги хабарида эса ушбу лойиҳа бўйича тарифини оптималлаштириш юзасидан қўшимча музокаралар олиб борилиши айтилган.

Вазирлик, шунингдек, таҳририятнинг «агар хитой компанияси вазирлик берган тариф таклифларига рози бўлмаса-чи?» мазмунидаги саволига ҳам тўхталиб, «агар, Ўзбек томонининг тарифни тушириш бўйича талабига Хитой томони кўнмаса, Ўзбекистон улар билан ушбу лойиҳа юзасидан шартнома имзоламасликка ҳаққи бор»лигини айтмоқда.