Ўзбекистоннинг Ирландиядаги Фавқулодда ва Мухтор элчиси этиб тайинланган Равшан Усмонов (қароргоҳи Лондон шаҳрида) ушбу мамлакат Ташқи ишлар ва савдо вазирлиги Протокол департаменти раҳбари Ральф Викторга ишонч ёрлиқлари нусхаларини топширди.

Учрашув чоғида Ўзбекистон ва Ирландия ўртасидаги ҳамкорликни ривожлантириш истиқболлари юзасидан фикр алмашилди. Савдо-иқтисодий, маданий ва туризм соҳаларидаги алоқаларни жадаллаштириш масалаларига алоҳида эътибор қаратилди.

Шунингдек, қишлоқ хўжалиги, ахборот-коммуникация технологиялари, фармацевтика ҳамда қайта тикланувчи энергия соҳалари истиқболли йўналишлар сифатида қайд этилди.

Суҳбат якунлари бўйича Ирландия томони Ўзбекистон элчисига икки томонлама муносабатларни ривожлантириш ва кенгайтириш борасидаги фаолиятида муваффақиятлар тилади.

Маълумот учун, Равшан Усмонов 2023 йил 14 ноябрь куни Ўзбекистоннинг Буюк Британиядаги элчиси сифатида Лондон шаҳрига келган эди. 2024 йил 16 май куни у Буюк Британия ва Шимолий Ирландия Бирлашган Қироллиги Қироли Чарльз III га ишонч ёрлиқларини топширган. 2025 йил февраль ойида эса мамлакатимизнинг Исландиядаги илк элчиси сифатида президент Халла Томасдоттирга ишонч ёрлиқларини тақдим этган эди.