Бош прокуратура Нукус воқеаларида айбдор деб топилиб, жорий йил 31 январ куни суд ҳукми билан 3 йил мансабдорлик лавозимларида ва ички ишлар тизимида ишлаш ҳуқуқидан маҳрум этилган ва 6 йил озодликдан маҳрум қилинган Қорақалпоғистон Республикаси ИИВ собиқ ходими П.Шамшетовнинг ўлими юзасидан расмий баёнот берди.

Маълум қилинишича, Шамшетов 4 февраль куни Ўзбекистон Республикаси Ички ишлар вазирлиги ҳузуридаги Жазони ижро этиш департаментига қарашли  4-сонли тергов ҳибсхонасида тўсатдан вафот этган.

«Ҳодиса жойи Бухоро вилояти прокурори раҳбарлигидаги тезкор-тергов гуруҳи, вилоят ИИБ бошлиғи, суд-тиббий экспертиза мутахассислари ва холислар иштирокида кўздан кечирилди.

Мазкур кўздан кечириш жараёнларида Олий Мажлиснинг Инсон ҳуқуқлари бўйича (Омбудсман) Бухоро вилояти минтақавий вакили, П.Шамшетовнинг адвокати ва яқин қариндошларининг ҳам иштироки таъминланди», – дейилади Бош прокуратура маълумотида.

Шунингдек, ўлим сабабларини аниқлаш мақсадида суд-тиббий экспертизаси тайинланган.

Суд-тиббий экспертизаси ишчи гуруҳининг дастлабки маълумотига кўра, марҳум ўпка артерияси тромбоэмболияси, ўткир юрак-қон томири етишмовчилиги оқибатида вафот этган.

Ҳозирда Бухоро шаҳар прокуратураси томонидан терговга қадар текширув ҳаракатлари олиб борилмоқда.