Шу кунларда Тошкент шаҳридаги Ёшлар ижод саройида «Ўзбек миллий кино санъати ҳафталиги» бўлиб ўтмоқда. Бугун Россияда хизмат кўрсатган артист Фарход Маҳмудов тадбир доирасида ёш киноижодкорлар билан учрашди ва тажрибаси билан ўртоқлашди.

«Мен ҳали ўзимнинг энг севимли ролимни ўйнамадим. Умуман, агар актёр ўзининг севимли ролини ўйнаб, борини кўрсатиб бўлганини тан олса, у тугаган бўлади. Биз ҳар доим ўзлигимизни қидиришимиз лозим.

Мен кимман? Бир қарашда жуда оддий савол, аммо касбимизнинг барча моҳияти шунда мужассам.

Мен бирор режиссёрни ёмон ёки бошқасини яхши, деб айта олмайман. Уларнинг барчасини ҳурмат қиламан. Албатта режиссёрлар ҳар-хил бўлади, орасида кучлиси ҳам бор, заифроғи ҳам.

Шунақа режиссерлар борки, ҳамма нарсани тушунтиради, керак бўлса топшириқ беради. Аммо шундайлари ҳам бўладики, кўриб турасан, у кучли эмас. Ҳатто актёр билан гаплашишга ҳам қўрқади. Ҳамма гапини ассистент орқали етказади, ўзи эса мониторга тикилганча, индамай ўтиради. Аммо мана шундай режиссёрлар қандайдир йўл билан атрофида жуда кучли жамоани шакллантирган бўлади. Натижада фильм ҳам яхши чиқади.

Актёр — ижрочи. У режиссёр талаб қилган нарсани чиқариб бериши лозим. Албатта мен нимадир ўйлаб топишим мумкин, аммо уни ҳам режиссёрга кўрсатишим шарт. У тасдиқлаб бериши лозим.
Мен келажакда кучли режиссёрларни яна учратаман, деб ўйлайман. Балки ўша режиссёр мана шу ерда, орангизда ўтиргандир», — деди Фарҳод Маҳмудов.

«Янги Ўзбекистон ва Миллий кинемотография» шиори остида ўтказилаётган «Ўзбек миллий кино санъати ҳафталиги» давом этмоқда. Xabar.uz таҳририяти тадбирни кузатишда давом этади.