Коронавирусни юқтирганлар касалликнинг дастлабки кунларида уни кўпроқ тарқатишади.  Бу ҳақда Жаҳон соғлиқни сақлаш ташкилотининг COVID-19 га қарши кураш техник раҳбари ва эпидемиолог Мария Ван Керхове брифингда айтиб ўтди.

«Айни вақтда ихтиёримиздаги маълумотларга асосланиб шуни айтишимиз мумкинки, касалликнинг бошланишида, аломатлар энди ривожланаётганда одам организмида вирус зарралари кўп бўлади», — деди тиббиёт ходими.

АҚШ ва Германияда ўтказилган дастлабки тадқиқот натижаларига кўра, COVID-19 нинг енгил ва ўртача аломатлари бўлган одамлар касаллик бошлангандан сўнг 8-9 кунгача юқумли бўлади. Касаллиги оғирроқ кечган беморлар яна-да узоқроқ вақтгача юқумли бўлиб қолади, дея таъкидлади Ван Керхове.

Аввалроқ шифокор коронавируснинг аломатсиз ташувчилари камдан-кам ҳолларда касаллик тарқатишини айтганди. Шифокорларнинг танқидларидан сўнг у бундай ҳолатлар глобал миқёсда жуда кам кузатилишини изоҳлади. Касалликни моделлаштириш тадқиқотларига таяниб эпидемиолог коронавирус тахминан 40 фоиз ҳолатларда юқишини маълум қилди.

Мартнинг бошларида ЖССТ янги коронавирус инфекцияси тарқалишини пандемия дея эълон қилди. Маълумотларга кўра, дунё бўйича 7 миллиондан ортиқ киши касалликка чалинган бўлиб, шулардан 400 мингдан зиёди ҳаётдан кўз юмди.