Коронавирус аниқланган беморларнинг аҳволи қандай? Бу саволга Ўзбекистон Республикаси соғлиқни сақлаш вазири Алишер Шодмонов жавоб берди.

«Оғир аҳволдаги беморларимиз йўқ. Бу барчамизни тинчлантирадиган ҳолатдир. Бугунги кунда шифохоналаримизда 641 фуқаро карантинда турибди. Буларда касаллик йўқ. Лекин беморлар билан яқин мулоқотда бўлишган. Бу борада айтмоқчиманки, карантинга олаётганимизда уларнинг касбига, лавозимига қаралмаяпти. Ҳаммани тушунтирган ҳолда мажбурий карантинга ўтказяпмиз. Бугунги кунда шифохонада беморлар билан мулоқотда бўлган тиббиёт ходимларини ҳам карантинга қўйганмиз. Бундан ташқари, карантинда ички ишлар, божхона, чегара ходимлари ҳам бор. Фуқаро ўтиб кетаётган пайтда касаллик белгиси бўлмаган, лекин биз бир кун ё икки кундан кейин текширувда аниқлаганимизда ким билан мулоқотда бўлган бўлса, уларнинг барчасини карантинга оляпмиз. Бемор билан яқин мулоқотда бўлганларни шифохонада, карантинга олинганлар билан мулоқотда бўлганларни эса уйдаги карантинга оляпмиз. Мана ҳозир икки кун ичида 5 минг 661 фуқаромизни уйдаги карантинга ўтказганмиз. Ўйлайманки, шу каби кўрилаётган чоралар мамлакатимизда бу касалликнинг кескин тарқалиб кетиши ва бошқарувсиз ҳолатга келиб қолишининг олдини олишга ёрдам беради».