Кеча, 2 май куни Халқаро пресс-клубнинг навбатдаги сессияси бўлиб ўтди. Сессияда Ўзбекистон Президентининг «Фуқароларни ижтимоий қўллаб-қувватлаш бўйича қўшимча чора-тадбирлар ҳамда ўзбошимчалик билан қурилган турар жойларга нисбатан мулк ҳуқуқини эътироф этиш бўйича бир марталик умумдавлат акциясини ўтказиш тўғрисида»ги фармони муҳокама қилинди. Бу ҳақда «Daryo.uz» хабар бермоқда.

Тадбирда иштирок этиган «Daryo.uz» нашри мухбирининг «Кўп қаватли уйларнинг биринчи қаватида ноқонуний тарзда ўзлаштирилган ерларда барпо этилган қурилмаларга мулк ҳуқуқи эътироф этиладими-йўқми?» — деган саволига «Давергеодезкадастр» қўмитаси бўлим бошлиғи Мирвосил Агзамов қуйидагича жавоб берган:

«Фармон лойиҳасида кўп қаватли уйларнинг биринчи қаватидаги ноқонуний қурилмаларга нисбатан мулк ҳуқуқи эътироф этилиши кўзда тутилмаган. Ҳужжат кўп қаватли уйларнинг биринчи қаватида қуриб олинган уйларга нисбатан татбиқ этилмайди, у фақат якка тартибда уй-жой қуриш учун мўлжалланган ерларга нисбатан амал қилади».

Қайд этилишича, Ўзбекистон Республикаси Уй-жой кодексига кўра, кўп қаватли уйларнинг биринчи қаватидаги умумий фойдаланишда бўлган ерлардаги ноқонуний қурилмаларга ҳеч қандай тартибда мулк ҳуқуқи берилмайди.