Ташқи меҳнат миграцияси агентлиги матбуот котиби Ортиқхўжа Норов ўзининг Телеграмдаги саҳифасида Жанубий Кореяга ишга кетишда тест имтиҳонлари талаб этилмайдиган тоифалар ҳақида маълумот бериб ўтди.

Улар қуйидагилар:

Лаёқатли ишчи мақомини олган фуқаролар (ВИП);

1. Корея Республикасида 4 йил 10 ой бир корхонада меҳнат фаолиятини амалга оширган ва шартномаси тугагандан сўнг корхонадан қайта шартнома билан келган фуқаролар;

 2. Бунда фуқаро биринчи меҳнат шартномасини тугатгандан сўнг ёши 39 ёшдан ошган бўлса ҳам қайта шартнома билан меҳнат фаолиятини амалга ошириши мумкин;

3. Хорижга чиқиш учун тақиқи бўлмаган ҳамда хорижга чиқиш паспорти мавжуд фуқаролар;

 4. Ҳар томонлама соғлом, юқумли касалликка чалинмаган фуқаролар;

 5. Корея Республикаси ҳудудига киришга тақиқи йўқ фуқаролар;

 6. Муқаддам судланмаган фуқаролар;

7. Корея Республикасида 5 йилдан ортиқ муддатда ишламаган фуқаролар.

Фуқаро Жанубий Кореядан Ўзбекистон Республикаси ҳудудига кириб келган кундан бошлаб, 90 кун муддат ичида Корея Республикаси иш берувчиси билан келишилган ҳолда жўнаб кетиши зарур.

Эслатма: Фуқароларни Корея Республикасига ишга жўнатиш (E-9 ишчи виза) ҳуқуқига эга ягона ташкилот Ташқи меҳнат миграцияси агентлиги ҳисобланади, хусусий бандлик агентликларининг бунга ваколати йўқ.