«UzAuto» раҳбариятининг Андижон вилоятидаги тизим корхоналарига ташрифи давом этмоқда. Жорий йилнинг март ойи бошидан давом этаётган ташриф доирасида, «Ўзавтосаноат» АЖ бошқарув раиси Шавкат Умурзоқов ўз ўринбосарлари, бошқарма бошлиқлари ва Комплаенс хизмати вакиллари иштирокида Асака шаҳридаги «UzAuto Motors» заводи ва саноат корхоналарининг бизнес-режалари ижросини комплекс ўрганмоқда.

Саноат раҳбари ташрифи давомида 30 га яқин маҳаллийлаштириш корхоналари, жумладан, «Uz Koram Ko» МЧЖ, «Uz-Tong Heung Co» АЖ, «O‘z Erae Climate Control» МЧЖ ва бошқа корхоналарда бўлди. Комплаенс хизмати билан ҳамкорликда Шавкат Умурзоқов соҳадаги ҳар бир корхонада аудиторлик текширувини ўтказмоқда, хусусан, логистика, таъминот занжири (Supply Chain), маҳсулот сифатини яхшилаш ва бизнес-режалар бажарилишини ўрганилмоқда.

15 март куни «UzAuto Motors»да Шавкат Умурзоқов раислигида бўлиб ўтган кенгайтирилган ишчи йиғилишидаги асосий мавзу 2022 йил учун бюджет ва бизнес-режа масалалари бўлди. «Ўзавтосаноат» бошқарув раиси ўзининг қисқа кириш сўзида бу йилги бизнес-режада нафақат белгиланган мақсадларга эришиш, балки 2021 йилда нималар ўтказиб юборилганига ҳам жиддий эътибор қаратиш зарурлигини таъкидлади.

Жорий йилда бутун автомобилсозлик саноати ва «UzAuto Motors» олдига аниқ мақсад қўйилди – автомобил ишлаб чиқаришда максимал юқори кўрсаткичларга эришиш. Шу билан бирга, йиғилишда таъкидланганидек, автомобил ишлаб чиқарувчиларнинг 2022 йилги бизнес режасида доимий ўзгарувчан сиёсий-иқтисодий муҳит шунингдек, давом этаётган логистика ва яримўтказгичлар инқирози каби қийин шароитларда сифатни яхшилаш ва ишлаб чиқаришни оптималлаштириш билан маҳсулот қаторини кенгайтириш учун жуда катта мақсадлар қўйилган.