What Car автомобиллар портали иккиламчи бозордаги энг ишончсиз электромобиллар антирейтингини тузди. Портал ҳайдовчилар ўртасида сўров ўтказди.

Машиналар 100 балли тизимда баҳоланди.

Иккинчи қўлдан олинган электромобиллар орасида 2022 йилдан буён чиқарилаётган MG4 EV энг ишончсизи деб топилди. Сўровда қатнашганлар унинг ишончлилик даражасини 63,8 фоиз дея баҳолашди, сўроққа тутилган ҳайдовчиларнинг 30 фоизида бу машина бузилиб қолган, шу боис натижадан ажабланмаса ҳам бўлади.

Иккинчи ўринда — Vauxhall Corsa Electric. Ишончлилик рейтинги 72,2 фоизни ташкил этган бу электромобилдаги носозликлардан сўровда қатнашганларнинг 25 фоизи шикоят қилишган.

Учинчи ўринда — Porsche Taycan. Ишончлилик даражаси 76,2 фоизга баҳоланган бу машинани ҳайдовчиларнинг 58 фоизи турли техник муаммоларга дуч келишган.

Энг ишончсиз электромобиллар бешлигига, шунингдек, 2021 йилда чиқарилган Hyundai Ioniq 5 ҳамда 2016 йилда чиққан Hyundai Ioniq киритилган. Бу машиналарининг ишончлилик даражаси тегишли тартибда 83,9 фоиз ва 84,5 фоизни ташкил этган.