Чет эл разведкаси ва ҳукуматга қарши ҳаракатлар билан ҳамкорлик қилганликда гумон қилинаётган «Amad News» янгиликлар портали раҳбари Рухолла Зам ўлим жазосига ҳукм қилинди. Бу ҳақда Эрон Олий суди вакили Ғулом Ҳусайн Исмоилий маълум қилган.

«У ўлимга ҳукм қилинди», — дея унинг сўзларини келтирган «Tasnim» агентлиги. Исмоилийнинг қўшимча қилишича, қарор якуний эмас, бундан чиқди, суд ҳукмидан норози томон шикоят аризасини топшириши мумкин.

14 октябрь куни IRNA агентлиги Замнинг Исломий инқилобий муҳофизлари корпуси томонидан қўлга олинганлиги тўғрисидаги хабарни чоп этганди. У ҳукуматга қарши ҳаракат ҳамда Франция, АҚШ ва Исроил разведкалари билан ҳамкорлик қилишда айбланяпти. Кейинчалик Эрон ОАВ «Amad News» портали раҳбари ҳибсга олингандан кейин тасвирга олинган видеоларни кенг оммага тақдим этди.

Зам ўз фаолиятини хорижий давлатларда олиб борувчи эронлик журналист сифатида танилган. Франция унинг доимий яшаш жойи ҳисобланган. У 2017-2018 йилларда Эронда норозилик намойишларини ёритишда, айниқса, фаол бўлган.