Украина президенти Володимир Зеленский Американинг Associated Press ахборот агентлиги журналистларига бир соатлик интервю бериб, Россиянинг уч йиллик кенг кўламли босқинидан сўнг Украинада тинчлик ҳар қачонгидан ҳам яқинроқ эканини айтди. У, шу билан бирга, Украина вакиллари иштирокисиз урушни тугатиш бўйича музокаралар ўтказиш ғоясини хавфли деб атади.

Зеленский, шунингдек, Россия бу урушда ўзини ғалаба қозонгандек ҳис қилмаслиги бутун дунё барқарорлиги учун муҳимлигини, чунки бу ҳолда бошқа йирик давлатлар ҳам унинг ҳаракатларини такрорлаши эҳтимолини истисно қилмади.

«Менимча, агар Америка ва Россия ўртасида Украинасиз урушни тугатиш хусусида тўғридан-тўғри музокаралар олиб борилаётган бўлса, бу жуда хавфлидир. Уларнинг ўз муносабатлари бўлиши мумкин. Аммо бизсиз Украина тақдири ҳақида гапириш ҳамма учун хавфли», – деди Украина президенти.

Унинг тушунтиришича, «агар президент Трамп ва у уруш қандай якунланиши борасида келгусидаги ҳаракатлар режасини муҳокама қилса», ундан кейин ҳар қандай музокаралар ўтказилиши мумкин ва бу нормал ҳолат.

Зеленскийнинг қўшимча қилишича, Трамп билан сўнгги учрашувлари чоғида улар АҚШнинг янги президенти лавозимига киришганидан сўнг имкон қадар тезроқ музокаралар ўтказишга келишиб олган.

Трамп Украинадаги урушни тугатиш учун имкон қадар тезроқ Путин билан телефон орқали қўнғироқлашишини, кейин эса учрашув ўтказиш ниятида эканини бир неча бор таъкидлаган. У Зеленскийни бундай музокараларга жалб қилишга тайёрми ёки йўқлигини айтмаган.

«Менимча, Трамп билан суҳбатимиздан сўнг биз руслар билан қандайдир мулоқот форматига ўтишимиз керак. Ва мен биринчи навбатда Америка Қўшма Штатлари, Украина ва русларни музокаралар столида кўришни истардим. Шу билан бирга, у ерда Евроиттифоқнинг ҳам овози бўлиши керак. Ўйлайманки, бу адолатли бўларди», – дейди Зеленский.

Зеленский, шунингдек, интервьюсида Трампнинг Россия ва Украина бўйича махсус вакили Кейт Келлог томонидан илгари сурилган урушни 100 кун ичида тугатиш режасига ҳам изоҳ берди.

Унинг сўзларига кўра, АҚШдаги янги маъмурият Москвани «тўлиқ санкция чоралари» ва Украина армиясини қўллаб-қувватлашни давом эттириш орқали можарони дипломатик йўл билан ҳал қилишга мажбур қилиши мумкин.

Украина етакчиси, ўз навбатида, мамлакат хавфсизлигини кафолатлашнинг энг мақбул варианти унинг НАТОга аъзолиги эканлигини таъкидлаган. Қолаверса, у мамлакат АҚШ ва Европадан етарлича қурол-яроғ билан таъминланиши ҳамда ўз мудофаа саноатини ривожлантиришда қўллаб-қувватланиши кераклигини айтган.