Туркияда 6 февраль куни рўй берган даҳшатли зилзиладан омон қолган жабрдийдаларда руҳий нохушлик қайд этилмоқда. Масалан, Искендерун шаҳрида ташкил этилган кўчма тиббий шохобчаларга травмадан кейинги руҳий беқарорлик бўйича мурожаат қилганлар сони кўпайган. Бу ҳақда TRT World шифокорларга таяниб хабар берди.

«Дастлаб бизга вайроналар остида қолиб жароҳатланганлар келтирилган эди. Энди эса кўпроқ травмадан кейинги руҳий беқарорликдан азият чекаётган беморлар мурожаат қилмоқда. Зилзила пайти бошдан кечирилган даҳшатлар изсиз кетмаган», – дейди ҳиндистонлик ҳарбий шифокор Бина Тивари.

«Аср фалокати» деб аталаётган, Туркиянинг 10 та вилоятига зиён келтирган зилзила оқибатида Искендерун шифохонаси ҳам кунфаякун бўлган. Ҳиндистондан келган 100 га яқин мутахассис эса сайёр шифохона ташкил қилган ҳолда беморларга кўмак бермоқда.

Травмадан кейинги руҳий беқарорлик шу жиҳатдан хатарлики, бемор фожиани қайта-қайта бошдан кечиргандек бўлади. Даҳшатли туш, диққат-эътиборни жамлай олмаслик, ҳардамхаёллик хасталикнинг белгилари саналади.

Табиийки, яқинларидан айрилиш, бошпанасидан маҳрум бўлиш инсон руҳиятига кучли салбий таъсир кўрсатади. Руҳий изтироблар жисмоний азоб ва жароҳатлардан икки карра оғирроқ кечади.

Ўн кундан буён дала шароитида, чодирларда тунаётган одамларга юқумли хасталиклар ҳам хавф солмоқда.

Жаҳон соғлиқни сақлаш ташкилоти (ЖССТ) Туркиядаги зилзила жабрдийдаларига тиббий, руҳий кўмак кўрсатиш учун 43 миллион доллар ажратилишини маълум қилган.

«Бу борада талаб ва эҳтиёж соат сайин ошиб бормоқда. Чунки Туркия ва Суриядаги 26 млн одам гуманитар кўмакка муҳтож. Даҳшатли фожиадан бир ҳафтадан кўпроқ вақт ўтиб, совуқ об-ҳаво, санитария-гигиена шароити сабаб юқумли хасталиклар тарқалиши хавфи ҳам кучаймоқда», – дейди ЖССТнинг Европа бюроси директори Ҳанс Клюге.

Мутахассислар, айниқса, зилзилани бошдан кечирган болаларнинг руҳиятини изга солиш ва саломатлигини тиклаш мушкул кечишини таъкидламоқда.

ЮНИСЕФ таҳлилларига кўра, Туркия (4,6 миллион) ва Сурияда (2,5 миллион) жами 7 миллионга яқин болалар ер силкиниши даҳшатларини танасида ҳис этган.