АҚШ Гренландия устидан назоратни қўлга киритиши ўта зарур, бу Вашингтон учун ҳужум нуқтаи назаридан ҳам муҳимдир, деди президент Доналд Трамп 26 март куни журналист Винс Колианезега берган интервюсида.

«Гренландия бизга халқаро хавфсизлик учун керак. У бизники бўлиши шарт. Бу орол мудофаа нуқтаи назаридан ва ҳатто ҳужумга ўтиш борасида — биз учун керакли, айниқса, ҳозирги дунёда. Бу гапларни айтиш мен учун ёқимсиз, бироқ у бизники бўлишига тўғри келади», — таъкидлади Трамп.

Шунинг баробарида Трамп гренландияликларнинг ўзлари оролнинг АҚШ таркибига киришини исташларига аниқ ишончи йўқлигига иқрор бўлди.

«Бироқ биз уларни ишонтиришимиз ва бу ерни қўлга киритишимиз шарт. Акс ҳолда усиз (Гренландиясиз) нафақат АҚШ, балки Ернинг бу катта қисмини кераклича ҳимоялай олмаймиз. Уни олишимизга ишонаман», — дея қўшимча қилди Трамп.

Маълумот учун: Гренландия Дания таркибига киради, бироқ 2009 йилда ўз ички сиёсатини мустақил танлаш имконияти билан мухториятга эришган.