Шимолий Кореяда рақс ўқитувчиси ва унинг бир қанча шогирдлари ҳибсга олинди. Расмийлар сўзларига кўра, хореограф ва талабалар «капиталистик» ҳаракатларни ўрганаётган бўлган. Бу ҳақда Daily Mail маълум қилган.

Хабарларга кўра, рақс ўқитувчиси Пхенсон шаҳрида ҳибсга олинган. Аёл машғулотлар вақтида хорижий мусиқа ва рақс видеолари туширилган USB-дискдан фойдаланганликда айбланмоқда. Хореограф билан бирга дарсда қатнашган талабалар ҳам ҳибсга олинган.

«Текширув гуруҳи болаларга хорижий рақс ҳаракатларини ўргатаётган 30 ёшлардаги рақс ўқитувчисини қўлга олди», — дейилади хабарда.

ОАВ маълумотларига кўра, ҳибсга олинган аёл хусусий рақс академиясини бошқарган ва бир соатлик дарс учун 10 доллар ҳақ олган. Бундан ташқари, аёл маҳаллий партия амалдорининг набираси. Манбаларга кўра, хореографни бундай жинояти учун ўлим жазоси кутмоқда.

Аввалроқ Шимолий Кореяда мамлакат етакчиси Ким Чен Иннинг 2021 йилдаги фаолиятига бағишланган ҳужжатли филмни тақдим этгани ҳақида хабар берган эдик.

Филмда «озиб-тўзиб кетган» мамлакат раҳбари кўриниш берган.