Москва болалар хирургияси ва травматология илмий-тадқиқот институти шифокорлари бемор ошқозонидан 200 дан ортиқ магнит бўлакларни олиб ташлашди. Икки соат давом этган операция яхши якунланган. Бу ҳақда Москва соғлиқни сақлаш бошқармаси матбуот хизматига таяниб Мир24 нашри хабар қилмоқда.

Хабарга кўра, икки ёшли боланинг ота-онаси боланинг ахлати қора рангда эканлиги ҳамда унинг ички органларида магнит бўлаклар борлиги ҳақида шикоят билан шифокорларга мурожаат қилишган. Беморда ултратовуш ва рентгенография текширувлари ўтказилган. Натижада боланинг ошқозонида магнит ўйинчоқ қисмлари мавжудлиги аниқланган.

Шифокорлар уларни эндоскопик усулда, кесмаларсиз ва очиқ жарроҳликсиз олиб ташлашга қарор қилишган.

Жарроҳлар боланинг ошқозонига эндоскоп киритиб, у ерда жуда кўплаб магнит бўлакларини топдилар. Улардан баъзилари аллақачон меъда шираси билан деформацияга учраган, уларнинг қирралари кескинлашган ва шиллиқ қават учун хавф туғдирган эканлиги маълум бўлган. Шифокорлар эндоскопик тутқич билан бўлакларни бирма-бир олиб ташлашга муваффақ бўлишган. Икки соатлик операция давомида боланинг ошқозонидан жами 209 та магнит олиб ташланган.

«Бундан ҳам хавфли вазият бўлиши мумкин эди. Масалан, агар магнитлар қизилўнгач ёки ичакнинг турли қисмларида тўпланиб қолиши натижасида, улар ўзаро тортишиш ҳолати юзага келиши мумкин. Натижада ички органларда тешиклар пайдо бўлади. Бундай ҳолат оғир перитонитни келтириб чиқариши мумкин», – дейди болалар жарроҳи, эндоскопист Анастасия Харитонова.