Қозоғистон 2025 йилдан кейин Ўзбекистонга кўмир экспортини босқичма-босқич йилига 12,8 миллион тоннагача оширади. Бу ҳақда Қозоғистон саноат ва инфратузилмани ривожлантириш вазири ўринбосари Эрон Шархон Остона шаҳрида бўлиб ўтган тўртинчи кўмир форумида гапириб ўтди.

«Бугун Қозоғистон ҳукумати томонидан 8 та лойиҳани амалга ошириш, шунингдек, ишлаб чиқариш ҳажмини оширишни кўзда тутувчи «2029 йилгача ёқилғи-энергетика комплексини ривожлантириш концепцияси» тасдиқланди. Экибастуз ГРЭСида янги энергия блоклари қурилиши бошланди, 2028 йилдан бошлаб Кокшетау ва Семей шаҳарларида ИЭСлар ишга туширилади. Ўзбекистонга 2025 йилдан бошлаб босқичма-босқич 12,8 миллион тоннагача кўмир етказиб бериш масаласи ҳам кўриб чиқиляпти. Мамлакатнинг экспорт йўналишлари кенгаяди”, – дейди Эрон Шархон.

Қайд этилишича, ўтган йили Қозоғистон Ўзбекистонга 13,6 млн долларлик 487,9 минг тонна кўмир етказиб берган. Бу кўрсаткич 2021 йилги ҳажмга нисбатан 18,4 фоизга кўпроқни ташкил қилган.