Буюк Британия қироличаси Елизавета II биринчи марта анъанани бузиб, парламентнинг очилиш маросимида Британия империяси тожини киймади, деб хабар берди «Лента».

Нашрнинг тахминича, оғирлиги 2 фунт 13 унций (1,3 килограмм) келадиган тож 93 ёшли қироличага ўта оғирлик қилган. Анъанавий қирол тожи бир неча мингта бриллиант, шунингдек, сапфир, дур ва зумрадлар билан безатилган.

Хабарга кўра, Елизавета II маросимга Георг IV диадемасини кийиб чиққан. Бироқ империя тожини қиролича салтанати рамзи сифатида барибир парламентга олиб келишган. Қиролича нутқ сўзлашидан олдин хизматкорлар тожни ёстиқчада олиб чиқишган.

Бу қироличанинг олтмиш бешинчи, Буюк Британиянинг янги бош вазири Борис Жонсон иштирокидаги биринчи нутқи бўлди. Елизавета II унинг ҳукумати 31 октябрда Буюк Британия Европа Иттифоқидан чиқиб кетишини таъминлаши кераклигини айтди. Қиролича вазирлар Европа Иттифоқидан чиқиш имкониятидан фойдаланиб, Европа Иттифоқи билан янги ҳамкорлик қилиш устида ишлашига ваъда берди.