Покистон ва Ҳиндистон ўртасида яна кескинлик юзага келди. Кашмирдаги туристларга қилинган ҳужумдан сўнг, Покистон оғир артиллериясини Ҳиндистон чегарасига жойлаштирди. Икки ядро қуролли давлат ўртасидаги зиддият кучаймоқда.

Покистон аскарлари баҳсли Кашмир минтақасида Ҳиндистон постларига ўқ узганини Ҳиндистон армияси тасдиқлади. Бу, сешанба куни Паҳалгамда 26 сайёҳни ўлдирган ҳужум ортидан содир бўлди.

Ҳиндистон Ташқи ишлар котиби Викрам Мисри Покистонни «трансчегаравий терроризмни қўллаб-қувватлашда» айблади ва барча Покистон фуқароларини 72 соат ичида мамлакатни тарк этишга чақирди.

Ҳиндистон шунингдек, 1960 йилдан буён амал қилиб келган Индус дарёси бўйича сув тақсимоти келишувини тўхтатди. Покистон бунга жавобан буни «уруш ҳаракати» деб атаб, жавобсиз қолдирмаслигини билдирди.

БМТ ҳар иккала томоннинг максимал сабр-тоқат билан ёндашишини сўради. Шунга қарамай, икки давлат чегарасида отишмалар давом этмоқда, аммо ҳозирча талофатлар ҳақида маълумот йўқ.

Вазият тобора мураккаблашиб бораётган бир вақтда, Ҳиндистон армияси Кашмирда хавфсизлик бўйича юқори даражадаги текширув бошлади. Ҳужумда гумон қилинган шахсларнинг уйлари бузиб ташланди.

Шунингдек, Покистон Ҳиндистон фуқаролари учун визаларни бекор қилиб, ўз ҳаво ҳудудини Ҳиндистон самолётлари учун ёпди.

Экспертлар икки давлат ўртасида дипломатик алоқаларнинг ёмонлашуви минтақадаги тинчлик учун хавф туғдиришини таъкидламоқда.