Американинг Колд Спринг Харборда жойлашган лаборатория тадқиқотчилари ўткир миелоид лейкоз ривожига олиб келувчи иккита нуқсонли ҳужайра мутациясини аниқлашди, деб хабар беради «MedicalXpress».

Лаборатория профессори Адриан Крейнер ўткир миелоид лейкозга IDH2 ва SRSF2 генлар мутацияси туртки бўлишини айтди. Мутахассис сўзларига кўра, бу мутациялар беморга саратонни енгишда зарур бўладиган эритроцит ва лейкоцитларда илик ҳужайралар етилишига тўсқинлик қилади. Айни вақтда лабораторияда қон саратонини даволашга ёрдам берадиган янги дори яратишга ҳаракат қилинмоқда.

Бу тадқиқотгача олимлар IDH2 ва SRSF2 генлари фақат саратон аломатларига таъсир кўрсатади деб ҳисоблашган. Бироқ энди касалликнинг келиб чиқишига генлар сабабчи эканига ишончлари комил. Крейнер энди жараёнга шифокорлар ҳам аралашиб, касалликнинг ривожланишини тўхтатишга уриниб кўришлари мумкинлигини қўшиб қўйди.

Ўткир миелоид лейкоз — хавфли қон саратони бўлиб, бунда ўзгарган оқ қон таначалари жадал кўпаяди. Касаллик тез чарчаб қолиш, вақти-вақти билан терининг жароҳатланиши, инфекцион шикастланишлар орқали намоён бўлади. Ўткир миелоид лейкоз даволанмаса, бир неча ҳафта ёки бир неча ойда беморни ҳаётдан олиб кетади.