Истанбул шаҳридаги Сабиҳа Гекчен аэропортидаги метрополитен станцияси очилди. 7,4 километрлик Pendik – Sabiha Gökçen тармоғи очилиш маросимида Туркия президенти Ражаб Тоййиб Эрдўғон қатнашган ва шахсан ўзи машинист сифатида йўналишни синовдан ўтказган.  

Туркия раҳбарига кўра, янги йўналиш очилиши билан Истанбул метрополитенининг умумий узунлиги 270 километрга етди. Тезкор ва қулай саналган ерости транспорти узунлигини  366 километрга етказиш режалаштирилган. Эрдўғон, айни чоқда, транспорт ва инфраструктурани такомиллаштириш бўйича йирик лойиҳалар амалга оширилишини маълум қилган.

Янги метро йўналишининг ишга туширилиши билан аэропортдан Истанбулнинг Осиё қисми марказига қадар 50 дақиқада етиб олиш мумкин бўлади.

Аввал хабар берганимиздек, жорий йил август ойида президент Ражаб Тоййиб Эрдўғон Кожаэли вилоятидаги полигонга ташриф буюриб, мамлакатнинг илк электромобилини шахсан синовдан ўтказганди. Туркияда ишлаб чиқарилаётган автомобиллар 2023 йилнинг биринчи чорагида бозорларда пайдо бўлади. Бурсадаги автозавод 5 турдаги енгил машина ишлаб чиқариши кўзда тутилган.