275 турдаги таомнома, саҳнада Рианна ва меҳмонлар орасида Ҳиллари Клинтон, Иванка Трамп, Марк Цукерберг ва бошқалар: Forbes рўйхатидаги ҳиндистонлик миллиардер ўғлига тўй берди.

Ҳиндистонда аср тўйи бўлиб ўтмоқда. Миллиардер Мукеш Амбани кенжа ўғли учун дунёдаги энг қиммат тўйлардан бирини ўтказди.

Тўйга рекорд даражадаги – 113 миллион доллар харажат қилинган. Рианна меҳмонлар учун қўшиқ куйлайди (бу унинг иккинчи фарзанди туғилгандан кейин саҳнага биринчи чиқиши).

Мукеш Амбанининг 28 ёшли ўғли Анант бошқа ҳинд магнати, фармсаноатчиси Вирен Мерчантнинг қизига уйланади.

Радҳика Мерчант ва Анант Амбани расман 12 июлда турмуш қуришади, аммо улар тўйни ҳозир ўтказишга қарор қилишган ва бутун дунёдан мингдан зиёд меҳмонлар Ҳиндистонга чақирилган.

Таклифнома олганларга ўта катта илтифот кўрсатилади: уларнинг диди ва овқатланиш истакларига қараб: 75 турдаги нонушта, 225 турдаги тушлик, 275 турдаги кечки овқат тортилади. Таомнома рўйхатидаги маҳсулотларнинг ҳеч бири кейинги кунда такрорланмаслиги алоҳида таъкидланади.

Меҳмонлар учун унутилмас саёҳатлар ташкил этилиб, ҳар бирига ҳинд миллий кийимлари ва алоҳида стилистлар ажратилган.

Мукеш Амбани номи Forbes миллиардерлар рўйхатида тўққизинчи ўринда қайд этилган. Унинг Reliance Industries корпорацияси нефть ва газ қазиб олишга ихтисослашган. Амбани бойлиги 111 миллиард долларга баҳоланган. Қуда томон – Мерчант оиласи эса йирик фармацевтика компаниясига эга.