АҚШ президенти Жо Байден 9 май куни «Украинада демократияни ҳимоя қилиш йўлида ленд лиз ҳақида»ги қонунга имзо чекди. Ушбу муҳим ҳужжат Иккинчи жаҳон урушида қозонилган ғалаба куни имзолангани рамзий маъно касб этиши айтилмоқда.

Украинага кенг миқёсда ҳарбий кўмак беришни назарда тутувчи қонун лойиҳаси жорий йил 3 май куни Конгресснинг Вакиллари палатасида якдиллик билан (лойиҳани 417 та депутат қўллаб-қувватлагани ҳолда, 10 нафари қарши овоз берган) маъқулланганди.

Янги қонунга кўра, АҚШ президенти Украина ҳамда Россия босқинидан жабр кўрган Шарқий Европа мамлакатларини моддий дастаклаш ва мудофаа воситаларини ижарага бериш борасида катта ваколатларга эга бўлади.

Қайд этиш жоизки, Қўшма Штатлар Иккинчи жаҳон урушидан бери ленд лиз тамойили асосида бирор давлатга кўмак ажратмаганди. Бундан 77 йил аввал Вашингтон мазкур тамойил асосида Европадаги иттифоқчиларига қурол-аслаҳа, ҳарбий техника ва озиқ-овқат маҳсулотларини узоқ муддатга, олдиндан тўловсиз тақдим этган эди.

Таҳлилчиларга кўра, Украинага ленд лиз тартибининг татбиқ этилиши Кремлга жиддий огоҳлантириш саналади. Чунки эндиликда АҚШ президенти Россия босқини жабрини кўраётган мазкур мамлакатга тезкор тартибда қурол-аслаҳа етказиб бериш имконига эга бўлади. Янги қонун бу борада Конгрессдан рухсат олишдек бюрократик тартибни бекор қилади. Кўп йиллик танаффусдан кейин мазкур тартибнинг кучга кириши Украинанинг ҳарбий позициясини мустаҳкамлаши ва мамлакатга катта миқдорда қурол-аслаҳа етказиш йўлини очиши кутилмоқда.

Украина президенти Владимир Зеленский янги қонунга имзо чекиб эркинлик йўлидаги курашга улкан ҳисса қўшгани учун америкалик ҳамкасбига миннатдорлик билдирган.

«Ленд лиз тўғрисидаги қонуннинг имзоланиши тарихий қадам бўлди. Биз яна ғалаба қозонишимизга ишончим комил. Бир ёқадан бош чиқариб, ҳам Украинада, ҳам Европада демократияни ҳимоя қиламиз. Худди 77 йил аввал бўлгани каби», – дейди В.Зеленский.

Россия Украинага жорий йил 24 февраль куни бостириб кирганидан буён АҚШ Украинага 800 млн доллардан учта ёрдам пакетини тақдим этди. Жорий йил 28 апрель куни президент Жо Байден Конгрессдан Украинага кўмак учун қўшимча 33 миллиард доллар ажратишни сўраб мурожаат йўллаган.