Rossiya tashqi ishlar vazirligi Yevropa Ittifoqi rahbariyatining mamlakatga kirishini taqiqlovchi sanksiya joriy qilinganini ma’lum qildi. Bu haqda vazirlik saytida xabar berildi.

«Cheklovlar Yevropa Ittifoqining yuqori rahbariyatiga, jumladan, bir qator Yevropa komissarlari va Yevropa Ittifoqi harbiy tuzilmalari rahbarlariga, shuningdek, Rossiyaga qarshi siyosatni ilgari surayotgan Yevroparlament a’zolarining katta qismiga taalluqlidir», — deyiladi vazirlik bayonotida.

Rossiya Tashqi ishlar vazirligi, shuningdek, bir qator Yevropa Ittifoqi mamlakatlari hukumatlari va parlamentlari vakillarini, shuningdek, «Rossiyaga qarshi noqonuniy sanksiyalarni ilgari surganligi» uchun jamoat arboblari va OAV xodimlarini «qora ro‘yxat»ga kiritdi.

«Qora ro‘yxat»ning o‘zi hali e’lon qilinmagan.

Eslatib o‘tamiz, Ukrainada urush boshlanganidan so‘ng Yevropa Ittifoqi shaxsan Rossiya prezidenti Vladimir Putinga, shuningdek, ko‘plab taniqli amaldorlar, milliarderlar va targ‘ibotchilarga, deputatlar va banklarga nisbatan sanksiyalar kiritgandi.