Indoneziyaning Banjarmasin shahrida yashovchi qiz noyob kasallik tufayli o‘n kundan ortiq uxladi. Bu haqda Mashable SE Asia nashri xabar bermoqda.

16 yoshli Siti Raisa Miranda 1-aprel kuni uxlab, ketma-ket to‘qqiz kun uyg‘onmadi. Qiz bu vaqtning bir qismini shifoxonada o‘tkazdi, keyin ota-onasi uyiga olib ketishdi. Vaqti-vaqti bilan ovqatlantirish yoki hojatxonaga olib borish uchun uyg‘otib turishdi. Bu katta qiyinchilik tug‘dirdi. Shundan so‘ng qiz yana uyquga ketgan.

10-aprel kuni qiz uyg‘ondi, lekin bir kundan keyin yana uxlab qoldi, deb yozadi Kompas gazetasi. U haqida Indoneziya matbuotida oxirgi marta xabar berilgan 12-aprelga qadar u boshqa uyg‘onmadi.

13 yoshida qizga Kleyn-Levin sindromi tashxisi qo‘yilgan: uyqudagi sohibjamol sindromi deb ham ataladi. O‘shandan beri u bir necha marta uzoq uyquga ketgan.

«Agar sindrom bo‘lmaganida, hammasi yaxshi bo‘lardi, — deydi otasi. — U maktabga boradi, do‘stlari bilan o‘ynaydi. Koronavirus pandemiyasi paytida ham u onlayn darslar va topshiriqlarni yaxshi bajardi».

Kleyn-Levin sindromi — noyob nevrologik kasallik. Bunda odam gipersomniya holatiga tushib qoladi va uzoq vaqt uxlashi mumkin. Ko‘pincha o‘spirinlik davrida kuzatiladi. Kasallik million kishidan bittasida uchraydi.